Foro Cívico Galego de Barcelona
A acta
de nacemento do Foro Cívico Galego de Barcelona parte dunha
iniciativa que arelou e arela, por riba de persoalismos, bandeiras
partidistas e intereses particulares, amosar en unidade de esforzos o
patrimonio cultural de Galicia e afirmar a súa identidade diferencial
(lingüística, cultural e cívica) da nosa comunidade en Barcelona nos seus
aspectos máis cualitativos.
Como cidadáns de Catalunya, e en razón da nosa singularidade identitaria de orixe, considerámonos formantes de pleno dereito deste puxante país posuidor de lingua, cultura de seu e personalidade política propia e diferenciada.
Como galego-cataláns e/ou catalán-galegos residentes en Cataluña (país no que teñen presencia inmigrantes dos cinco continentes), sabémonos tamén inmersos nunha sociedade plural, multicultural e multilingüística. Neste contexto, na mesma medida que temos o privilexio de compartir a lingua, a cu!tura e os bens públicos de Catalunya, identificámonos como minoría nacional diferenciada que sente a responsablidade de arrequecer o patrimonio deste país achegando o ser da propia identidade.
Como fillos e amigos de Galicia sentímonos unidos por lazos inalienables aos destinos vitais, políticos e culturais de Galiza como vello pobo peninsular e europeo; así mesmo, como colectivo emigrante identificámonos como parte viva da comunidade internacional denominada a Galicia Exterior, esa Nación galega espallada polo planeta, que afonda as súas raiceiras coa Terra Nai apertando varias xeracións de descendentes de emigrantes a través do lume da Galeguidade como vínculo material e espiritual.
